ماڵاوایی “حاجی حەسەن خورشیدی” پیرێکی‌ سەنگەری کوردایەتی و نیشتمانپەروەری

بەداخەوە باوکی بەڕێزمان  “حاجی حەسەن خورشیدی”  ئەمرۆ ڕێکەوتی ١٩ی خەزەڵوەری ١٤٠٠ به هۆی نەخۆشی کۆچی دوایی کرد.

حاجی حەسەن لە قوتابخانەی شۆرشی جوتیارانی موکریانەوە و دەرسی کوردایەتی فێربوو و یار و هاوڕێی کوڕ و کچانی دێمۆکرات لە پێش شۆرشی گەلانی ئێران بوو، ئەو لەسەرەتایی شۆرشەوە چەکی نیشتماندۆستی هەڵدەگرێ و لە پێشدا دا لە هێزی بە‌هێزی بەیان دواتر لە هێزی شەهید پێشەوا سازمان دەدرێ .لەو کاتەدا بەهۆی باوەری سەرکردایەتیی شۆرش بە حاجی حەسەن ، بەڕێزیان بۆ ماوەی دوو ساڵ وەک پێشمەرگەی پاڕێزەری هاوڕێی تێکۆشەر کاک حەسەن شەرەفی دیاری دەکرێت و دوایی ئەوە حاجی حەسەن بە هۆی تەمەن و ناساغی، سەنگەری شاخ بۆ لاوانی کوردستان بەجێدێلێ و لە سەنگەری  شارەوە نیشتمان دەپاڕێزی.

 حاجی لە ڕەوتی بزوتنەوەی نەتەوەی دێمۆکراتیکی کوردستان دا شەش شەهیدی پێشەکەشی نیشتمان کردووە دوو کوڕ بە ناوەکانی شەهیدان سەلاح و فەتاح خورشیدی دوو بڕازا بەناوەکانی  شەهیدان سمایل و خالید خورشیدی و دوو خاڵۆزا بەناوەکانی شەهید حەسەن مەحمودی و محەمەد ناسراو بە زریان.

 حاجی حەسەن تا دواپشووی ژیانی شەهیدانی بنەماڵەکەی و شەهیدانی کوردستانی بە گەورەترین سەرمایەی ژیانی دەزانی و ڕێبواری هەتا سەری ڕێگای شەهیدانی کوردستان بوو.

لە کۆتاییدا وێرای سپاس و پێزانین بۆ خەڵکی کوردستان بەتایبەتی خەڵکی قارنجە که هاوخەمی لەدەسچوونی باوکی بەڕێزمان بوو بە هەموو ئازیزان ڕادەگەیەنین که بە هۆی پەتای کۆڕۆنا کۆڕی پرسە بەڕێوە ناچێت و لەڕێگای ئەو ژومارە تەلەفوونانەوە دەتوانن هاوخەمی خۆتان بگەیەنە بنەماڵەی حاجی حەسەن.

بە حورمەتەوە بنەماڵەی خورشیدی

عوسمان خورشیدی: 004799335196

یۆسف خورشیدی:0046722067169

..

ئێمە وەک سایتی پێشمەرگەکان سەرەخۆشی خۆمان ئاڕاستەی هاوڕێیان کاک عوسمان و کاک یۆسف خورشیدی و سەرجەم بنەماڵەیان دەکەین و هیوادارین ئاخرین غەمیان بێ و روحی شاد بێ.